ᓱᓇᑦ ᐱᑦᑕᐃᓕᔭᕆᐊᖃᖅᑐᑦ ᓯᖓᐃᓂᕐᒥ

ᓯᒡᒐᓕᐊᖅᑐᕐᓂᖅ, ᐃᒥᐊᓗᒻᒥ ᐃᒥᖃᑦᑕᕐᓂᖅ, ᐋᖓᔮᕐᓇᖅᑐᓂᒃ ᐊᑐᖃᑦᑕᕐᓂᖅ ᐅᓗᕆᐊᓇᕈᓐᓇᖅᑐᑦ ᓇᔾᔨᐊᕆᔭᐅᔪᒧᑦ. ᓇᔾᔨᓕᕈᕕᑦ, ᐱᒻᒪᕆᐅᕗᖅ ᓄᖅᑲᐅᑎᓗᒋᑦ ᐅᕝᕙᓘᓐᓃᑦ ᐱᖏᓐᓂᖅᓴᐅᖃᑦᑕᓕᕐᓗᑎ ᐊᔪᖏᒃᑯᕕᑦ. ᐃᑲᔪᖅᑕᐅᒋᐊᖃᕈᕕᑦ, ᐋᓐᓂᐊᓯᐅᖅᑎᓯ ᐅᖃᖃᑎᒋᓗᒍ ᓄᓇᓕᑦᓯ ᐋᓐᓂᐊᕕᖓᓂ.

ᑐᐹᑭ

ᓯᒡᒐᓕᐊᑉ ᐳᔪᖓ ᐊᔪᕐᓇᕐᓂᖅᓴᐅᓕᖅᑎᑦᓯᓲᖑᒻᒪᑕ ᓇᔾᔨᐊᕆᔭᐅᔪᑦ ᐱᕈᑦᓯᐊᕈᓐᓇᕐᓂᖏᓐᓄᑦ, ᐊᒻᒪᓗ ᓱᕋᐃᒍᑕᐅᓂᖅᓴᐅᓲᖑᓪᓗᓂ. ᓯᒡᒐᓕᐊᖅᑐᙱᓐᓂᖅᓴᐅᓕᕈᓐᓇᖅᑐᑎᑦ ᐅᕝᕙᓘᓐᓃᑦ ᓯᒡᒐᓕᐊᖅᑐᙱᑦᑎᐊᒻᒪᕆᓕᕐᓗᑎᑦ, ᐊᒻᒪᓗ ᐃᓄᓐᓃᑦᑕᐃᓕᒪᓗᑎᑦ ᓯᒡᒐᓕᐊᖅᑐᖅᑎᓪᓗᒋᑦ, ᐱᐊᕋᐃᑦ ᐃᒪᐃᓕᖓᓂᐊᕐᒪ:

  • ᐃᕐᓂᐊᖑᓗᓂ ᐃᕐᓂᐊᖑᕕᑦᓴᖓᒍᑦ—ᐃᕐᓂᐊᖑᓴᕋᐃᓗᐊᖏᓪᓗᓂ
  • ᓈᒻᒪᑦᓯᐊᖅᑐᒥᑦ ᐃᓅᕋᑖᖑᓕᖅᑲᑦ ᐅᖁᒪᐃᓐᓂᖃᕐᓗᓂ - ᒥᑭᔪᑯᓘᓗᐊᖏᓪᓗᓂ
  • ᐅᓗᕆᐊᓇᖅᑐᒦᙱᓐᓂᖅᓴᐅᓗᓂ ᐱᐊᕋᐃᑦ ᓯᓂᑦᑎᓪᓗᒋᑦ ᐊᓂᕐᓂᖃᕈᓐᓃᑲᓪᓚᓂᕐᒧᑦ (SIDS)
  • ᐅᓗᕆᐊᓇᖅᑐᒦᙱᓐᓂᖅᓴᐅᓗᓂ ᐊᓂᖅᑎᕆᓂᕐᒧᑦ ᐊᑲᐅᙱᓕᐅᕈᑎᖃᕐᓂᕐᒥᑦ
  • ᐅᓗᕆᐊᓇᖅᑐᒦᙱᓐᓂᖅᓴᐅᓗᓂ ᓯᐅᓯᕆᖃᑦᑕᓂᕐᒧᑦ.

ᐃᒥᐊᓗᒃ

ᐊᑦᑕᕐᓇᙱᓐᓂᖅᐹᖑᔪᖅ ᐃᒥᐊᓗᒻᒥ ᐃᒥᖃᑦᑕᖏᑦᓯᐊᒻᒪᕆᓪᓗᓂ ᓇᔾᔨᓂᕐᓂ. ᓇᔾᔨᐊᕆᔭᐅᔪᑦ ᐃᒥᕈᑕᐅᖃᑦᑕᖅᑐᑦ ᐅᓗᕆᐊᓇᖅᑐᒦᑦᑐᑦ ᑖᑦᓱᒧᖓ ᓇᔾᔨᐊᖑᑎᓪᓗᒍ ᐃᒥᐊᓗᒻᒧᑦ ᐃᑦᓴᖅᓯᒪᓂᖅ [FASD].

ᓇᔾᔨᐊᖑᑎᓪᓗᒍ ᐃᒥᐊᓗᒻᒧᑦ ᐃᑦᓴᖅᓯᒪᓂᖅ (FASD) ᑕᐃᒎᓯᐅᔪᖅ ᓇᓗᓇᐃᖅᓯᓪᓗᓂ ᐊᔾᔨᒌᙱᑦᑐᓂᑦ ᐊᑦᑐᖅᑕᐅᓯᒪᓂᖓᓄᑦ ᐱᐊᕋᐅᑉ ᓇᔾᔨᔪᖅ ᐃᒥᐊᓗᒻᒥ ᐃᒥᖃᑦᑕᕈᓂ ᓇᔾᔨᓂᖓᓂ. ᑖᒃᑯᐊ ᐊᑦᑐᖅᑕᐅᓯᒪᓃᑦ ᐃᓚᖃᑐᐃᓐᓇᕆᐊᓖᑦ ᑎᒥᒃᑯᑦ, ᐃᓱᒪᒃᑯᑦ, ᐃᓕᖅᑯᓯᒃᑯᑦ, ᐊᒻᒪᓗ/ᐅᕝᕙᓘᓐᓃᑦ ᐃᓕᑉᐸᓪᓕᐊᓂᕐᒧᑦ ᐱᒡᒐᕈᑎᖃᕐᓂᕐᒥᑦ.

ᐊᑦᓱᕈᓐᓇᕈᓐᓇᖅᑐᖅ, ᑭᓯᐊᓂ ᐃᓄᒋᐊᑦ ᓄᖅᑲᐅᑎᒍᓐᓇᖅᑐᑦ ᐅᕝᕙᓘᓐᓃᑦ ᐊᑐᙱᓐᓂᖅᓴᐅᓗᑎ ᓱᕐᕋᕐᓇᖅᑐᓂᒃ ᖃᐅᔨᒐᐃᒻᒪᑕ ᓇᔾᔨᓕᕐᓂᖏᓐᓂᒃ. ᓄᖅᑲᕈᓐᓇᙱᑦᓯᐊᒻᒪᕆᒃᑯᕕᑦ, ᖃᐅᑕᒫᑦ ᐊᑐᙱᓐᓂᖅᓴᐅᒐᓱᖔᖃᑦᑕᕐᓗᑎᑦ. ᐅᖃᖃᑎᖃᕐᓗᑎ ᐱᖃᑎᓐᓂ, ᐃᓚᒋᔭᓐᓂ, ᐅᕝᕙᓘᓐᓃᑦ ᐋᓐᓂᐊᖅᑐᓕᕆᔨᒥ ᐃᕝᕕᑦ ᑕᑎᒋᔪᓐᓇᖅᑕᖓᓂ ᐃᒥᐊᓗᒻᒥ ᓄᖅᑲᐅᑎᒍᒪᒍᕕᑦ ᐅᕝᕙᓘᓐᓃᑦ ᐃᒥᙱᓐᓂᖅᓴᐅᒍᒪᒍᕕᑦ ᐃᑲᔪᖅᑕᐅᒋᐊᖃᕈᕕᓪᓗ.

ᐱᕈᖅᑐᕕᓂᖅ

ᐊᑦᑕᕐᓇᙱᓐᓂᖅᐹᖑᔪᖅ ᓇᔾᔨᔪᓄᑦ ᐊᒻᒪᓗ ᐃᕕᐊᙱᕐᒥᓂᒃ ᐊᒫᒪᑎᑦᓯᔪᓄᑦ ᐱᕈᖅᑐᕕᓂᖅ ᐊᑐᖃᑦᑕᖏᓪᓗᑎ. ᖃᐅᔨᒪᔭᐅᙱᑦᑐᖅ ᖃᓄᖅ ᐊᑦᑕᕐᓇᙱᒃᑲᓗᐊᕐᒪᖔᖅ ᐱᕈᖅᑐᕕᓂᖅ ᐊᑐᖃᑦᑕᕐᓗᓂ ᓇᔾᔨᓂᕐᓂ. ᐱᕈᖅᑐᕕᓂᖅ ᐊᑐᕐᓗᓂ ᓇᔾᔨᓂᕐᓂ ᐱᐊᕋᖅ ᐃᓅᑐᐃᓐᓇᕆᐊᓕᒃ ᒥᑭᔫᓗᓂ ᐊᒻᒪᓗ ᕿᑐᕐᖓᕆᔭᐅᔪᖅ ᐊᑲᐅᙱᓕᐅᕈᑎᖃᓕᕐᓗᓂ ᐃᖅᑲᐅᒪᑦᓯᓂᕐᒧᑦ, ᓈᓚᑦᓯᐊᕐᓂᕐᒧᑦ, ᖃᓄᖅᑑᕐᓂᕐᒥᑦ, ᐊᒻᒪᓗ ᐃᓕᖅᑯᓯᖓᓂ

ᐄᔭᒐᐃᑦ

ᐋᓐᓂᐊᖅᑐᓕᕆᔩᑦ ᐅᖃᐅᑎᓗᒍ ᖃᓄᐃᑦᑐᓂᑦ ᐄᔭᒐᖃᑦᑕᕐᒪᖔᖅᐱᑦ ᐊᒻᒪᓗ ᖃᖓᒃᑯᑦ ᐄᓯᖃᑦᑕᕐᒪᖔᖅᐱᑦ ᐄᔭᒐᐃᑦ ᐃᓚᖏᑦ ᐊᒻᒪᓗ ᐄᖅᑲᖅᑕᐅᖁᔭᐅᔪᑦ ᐃᓚᖏᑦ ᐅᓗᕆᐊᓇᕈᓐᓇᖅᑐᑦ ᓇᔾᔨᐊᖑᔪᓄᑦ. ᐄᔭᒐᐃᑦ/ᐋᖓᔮᕐᓇᖅᑐᑦ ᐃᓚᖏᑦ ᐅᓗᕆᐊᓇᕈᓐᓇᖅᑐᑦ ᐱᐊᕋᕐᒪᑦ ᐃᓅᓯᒪᓕᖅᑐᒧᑦ, ᐃᕕᐊᙱᐅᑉ ᐃᒻᒧᖓᑎᒍᑦ.

  • ᐋᖓᔮᕐᓇᖅᑐᑦ ᐊᑐᖅᑕᐅᒋᐊᖃᙱᑦᑑᒐᓗᐊᑦ ᒪᓕᒐᖅᑎᒍᑦ — ᕼᐃᐊᕈᐃᓐ, ᐱᕈᖅᑐᕕᓂᖅ, ᑰᑲᐃᓐ, ᒪᑦ, ᐊᓯᖏᓪᓗ.
  • ᒪᓕᒐᖅᑎᒎᖅᑐᑦ ᐊᒻᒪᓗ ᐋᓐᓂᐊᕕᑎᒍᑦ ᐄᔭᒐᖅᑖᕆᔭᐅᓲᑦ,
  • ᐱᕈᖅᑐᒥᓃᑦ ᐄᖅᑲᖅᑕᐅᓲᑦ ᐊᒻᒪᓗ ᑎᒥᒧᑦ ᐃᑲᔫᑎᓖᑦ ᐄᔭᒐᑦ

ᐃᑲᔪᖅᓱᖅᑕᐅᓂᖅ

ᐃᓚᖏᑦ ᐊᑐᖃᑦᑕᖅᑐᑦ ᐃᒥᐊᓗᒻᒥ, ᑐᐹᑭᒥ, ᐊᒻᒪᓗ ᐋᖓᔮᕐᓇᖅᑐᓂᒃ ᐊᑦᓱᕈᖃᑦᑕᖅᑐᑦ ᓄᖅᑲᕋᓱᐊᕐᓂᕐᒥᑦ.

ᐃᕝᕕᓘᓐᓃᑦ ᐅᕝᕙᓘᓐᓃᑦ ᐃᕝᕕᑦ ᖃᐅᔨᒪᔭᖓᓂ ᐊᑦᓱᕈᖅᑐᖃᖅᑲᑦ ᓄᖅᑲᐅᔾᔨᓂᕐᒧᑦ ᐅᕝᕙᓘᓐᓃᑦ ᐊᑐᙱᓐᓂᖅᓴᐅᒍᒪᔪᓂᒃ ᑕᒪᒃᑯᓂᖓ: ᓯᒡᒐᓕᐊᖅᑐᕐᓂᕐᒥᑦ, ᐃᒥᐊᓗᒻᒥ ᐃᒥᖃᑦᑕᕐᓂᕐᒥᑦ ᐅᕝᕙᓘᓐᓃᑦ ᐋᖓᔮᕐᓇᖅᑐᓂᒃ, ᐃᑲᔪᖅᑕᐅᓇᖅᑐᖅ ᐊᒻᒪᓗ ᐃᑲᔪᖅᓱᖅᑕᐅᓐᓇᖅᑐᖅ. ᐅᖃᖃᑎᒋᓗᒍ ᐋᓐᓂᐊᖅᑐᓕᕆᔨᓯ, ᐃᓱᒪᓕᕆᔨᓯ, ᐅᕝᕙᓘᓐᓃᑦ ᐃᓄᓕᕆᔨᓯ.

ᐅᑯᓄᖓ ᐅᖃᕈᓐᓇᕆᕗᑎᑦ: