Taiguqhimmaarit
Arnaujaakhainun/Angutaujaakhainun
Aallangajut akun’ngani inuup arnaujaakhainun/angutaujaakhainullu. Arnaujaakhainun/Angutaujaakhainun pihimajuq taaffumunga timimikkut naunaitkutainut – arnaq, angut, imaaluuniit angutit arnat inngirutainik piqaqtut - taimaa inuup naunaiqtaudjutaanun inuulihaarangata taaktimin naunaitkutigivlugit ingilrutainun angajuqqaamingnin idjuhiatigun pihimajainun anilihaaraangamik.
Arnaq/Angut
Pihimagaluaqhuni arnaujaakhaa/angutaujaakhaa pihimajuq angajuqqanginit pidjutiqaqtun tainia, arnaq/angut iungni pitquhimilu tainiq. Arnaujaakhaa/Angutaujaakhaa pihimajuq qanuq inuup naunaitkutarijaanun pihimajuq inuuqatigiiktuni kangiqhihimajainik qanuq kangiqhidjutaanun arnaugumik, angutaugumik, tahapkunaungittumik, humilikaarluuniin ilaujumun arnaq/angut qanurinniinun.
Arnaq/Angut Naunaitkutait
Arnaq/Angut naunaitkutait pihimajut inuup iluamingnun inungmullu atuqpagainun arnauvlutik/angutauvlutik. Arnaq/Angut naunaitkutait taimaa inuup inmigut mihingnautait arnauvluni, angutauvluni, tamainik, taimaangungittumulluuniin, qanurliaarluuniin qanurinninganun arnaujaami/angutaujaami. Inuup arnaujumik/angutaujumik naunaitkutait pihimajungnaqhijuq aadjikkutaanik aallangajumikluuniin kituujaakhamik naunaiqtauvlutik anilihaaramik.
Arnat/Angutit Qanuq Pidjutigivagait
Arnat/Angutit qanuq pidjutigivagait pihimajuq qanuq inuk inungnin ilihimajaakhaanun tautuktauvluni idjuhigijainulluuniin kituujaakhaitigun. Arnat/Angutit qanuq pidjutigivagait ilauvaktut idjuhia unalu aanuraatigut, nujarminik, piniqhidjutinun, timiminunlu idjuhia nipaalu.
Arnaq/Angut naunaitkutait pivaktainun ukuat inuungmiunikkut pivaktait qanuq inuit takuniarumajainun takujainullu taimaa “angutaujutut” imaaluuniin “arnaujutut.” Annivingmingnin, inuit takuvaktut kangiqhivlutiklu arnaq/angutit pivaktainik ilamingnin, tuhaqtipkaidjutinin, aallanillu pivaktainik inungnit pidjutigivagainin. Arnaq/Angut naunaitkutait pivaktainun atuqhimajait pitquhirmingni, taimaa ‘ilitquhirmi’ arnat/angutit pivaktait Inuinnaujunun Inuinnaungitunullu aallatqiingujut amihuni pidjutainni. Arnaq/Angut naunaitkutait pivaktainun aallan’nguqtirpaktut kakugungurman pihimavlutiklu pidjutaujunun aallan’nguqtirutinun nutauniqhanik atuliqtainut hunavalungnik qaritaujakkuurutitut qanuriliurutingit atuqhimmaarutainullu ihuarivlugit, pitquhirmun uqauhirmullu, aallaniklu pidjutauvaktunun.
Inulrammiutillutik ukiunginni, inulrammiit inmiknik ihumaliqhutik pijamingnik pijumavlugit pivlugit aallatqiinik arnanut/angutinun pivaktainik. Pijumaniarungnaqhijait akhuurutigilugu pidjutaulluaqtunun ‘ilitquhirmi’ pivaktainun. Imaatut, inulrammiit angutit ihuariliqhugit igajaami, miqhuriami, ulapqiqatigilugilluuniin mikijut nutaqqat; inulrammiit arnaruttit ajuiqhimaliqhutik nalunaqtunik naunaijainikkut, ulapqidjutinun, anguniarnirmulluuniin.
Inuit ihumaluutiqalirumik pitqujaujumik kitunun arnanut/angutinun pivaktainik, ajuqharniaqtut. Akhuurutiginnaktuq paqittilutik hulilukaarutikhanik ihuarijamingniklu ihuarikpiarlugit inmik inuudjutikhamingnun inuuvlutik. Ajuqhautigiguvigit arnaujaakhaanun/angutaujaakhaanun arnanun/angutinun naunaitkutigivagainun qanurlu pijukhaujumik, avaliihimangittutit. Ikajuutauniarungnaqhijuq uqaqatigilugit itquumagijarnun ilannarijarnik, ilagijarniklu, ilihaijingnik, uqaudjigijarnikluuniin. Ikajuqtaujumaguvin, takulugu qaritaujakkut (atadjutaa una “nuliqinikkut ikajuut” ikajuutinun makpiraat).
Ukuat ataani naunaitkutit tainiit piqaqtut atuqpagainun naunaiqhidjutainik, ilihimajakhaat taimaa arnaujumik/angutaujumik inungmuinaq pihimajuq hiamitakhaungittuni, tamaita inuujut kangiqhihimaniaqtut naunaiqhilutiklu inmik arnaujaami/angutaujaami inmikkut pilutik.
| Idjuhiqaqtut aadjikkutaanik Inuuhimaniagut (Cisgender) | Angut arnaq: inuk kitut qanurinianun naunaijautaa aadjikkiingujuq inmi qanuriniatigut inuuhimaniagut. |
| Idjuhiqaqtut aallangajumit inuuhimaniagut (Transgender) | Angut arnaq: inuk kitut qanurinianun naunaijautaa aalangajuq inmi qanuriniatigut inuuhimaniagut. |
| Malrungnik piqaqtumik arnaujumik/angutaujumik idjuhiqaqtumik (2-Spirit) | Pitquhirmi tainiq atuqtaujuq ilanginnin Nunaqaqqaaqhimajunin inungnin naunaiqhijaami piqariami arnamik angutimiklu idjuhiqaqtumik. Una pihimajungnaqhijuq inmik idjuhiutimingnun, arnanun/angutinun kangiqhipkaidjutit, unalu arnaq/angut inmikkut naunaiqhidjutait. |
| Nalliaguunngittuq/t (Nonbinary) | Amihunun tainiq tamainnun arnaujunun/angutaujunun aallamik ukunanga arnaq/angut unalu arnaujuq/angutaujuq. |
| Malingittut pivaktainun Angutaugaluaqhutik/Anrnaugaluaqhutik (Genderqueer) | Tainiq atuqtauhimavaktuq inungnin inmik naunaiqhijuittut tautuktihimaittulluuniin inmik arnaujaamik/angutaujaamik malrungnik pidjutiqaqtunun. |