ᓇᑦᔨᐊᖃᕐᓂᖅ

ᐃᑲᔪᕐᑎ

ᑐᑭᓯᒋᐊᕆᐊᓪᓚᕕᒃ

ᐱᐊᕋᑦᓴᖃᕐᓂᖅ

ᐱᐊᕋᑦᓴᑖᕐᓂᕈᕕᑦ ᐊᑑᑎᒋᐊᕋᑦᓴᖃᕐᑐᑎᑦ

  • ᐱᐊᕋᕐᒥᒃ ᓇᔪᕐᑎᖃᕈᓐᓇᑐᑎᑦ
  • ᑎᒍᐊᖑᑎᒍᓐᓇᑌᑦ
  • ᐱᐊᕋᑦᓭᑕᐅᒍᓐᓇᑐᑎᑦ - ᐊᑦᑕᓇᕋᓂ ᐱᖁᔭᑎᒎᕐᓱᓂ ᐱᐊᕋᑦᓭᑕᐅᓂᖅ

ᑐᑭᑖᕈᓐᓇᑐᑑᔪᑎᑦ ᓇᓪᓕᐊᓂᒃ ᐊᑑᑎᒋᐊᕐᓂᐊᒪᖔᕐᐱᑦ. ᐅᖄᖃᑎᖃᕈᓐᓇᑐᑎᑦ ᐅᑉᐱᕆᔭᕐᓂᒃ -ᐃᓚᓐᓈᓂᒃ, ᐃᓄᑐᖃᕐᒥᒃ, ᐃᓚᑎᓐᓂᒃ, ᐃᑲᔪᕐᑎᒥᒃ, ᐋᓐᓂᐊᓯᐅᕐᑎᒥᒃ ᐃᓕᓐᓂᐊᑎᑦᓯᔨᒥᓪᓘᓃᑦ.

ᐋᓐᓂᐊᓯᐅᕐᑎᒪᕆᒻᒧᑦ ᐅᖄᓗᑎᑦ ᐋᓐᓂᐊᓯᐅᕐᑎᒧᓪᓘᓃᑦ ᐱᐊᕋᑦᓭᑕᐅᒍᒪᒍᕕᑦ ᐊᐱᕆᐅᑎᑦᓴᖃᕈᕕᓪᓘᓃᑦ ᐱᐊᕋᑦᓴᖃᕐᓂᓂᒃ. ᐅᖃᓕᒪᒍᓐᓇᑐᑎᑦ ᑲᓇᑕᒥ ᐃᑦᓯᒎᕐᓂᑯᑦ ᖃᓄᐃᖕᖏᓯᐊᕐᓂᓕᕆᔨᓄᑦ ᐱᒍᓐᓇᐅᑎᖃᕈᑎᓄᓪᓗ ᑐᑭᓯᒋᐊᕈᒪᒍᕕᑦ ᐅᕗᖓ (24/7): 1-888-642-2725.

ᐱᐊᕋᕐᑖᓂᐊᕐᓗᑎᑦ ᑐᑭᑖᕈᕕᑦ, ᐱᐊᕃᑦ ᖃᓄᐃᖕᖏᓯᐊᕈᓐᓇᑐᖅ ᖃᓄᐃᖕᖏᓯᐊᑐᐊᕈᕕᑦ. ᐋᓐᓂᐊᓯᐅᕐᑎᒪᕆᒻᒥᒃ ᐋᓐᓂᐊᓯᐅᕐᑎᒥᓪᓘᓃᑦ ᐱᐊᕋᑦᓴᖃᕐᓂᓂ ᑲᒪᒋᔭᐅᖃᑦᑕᓂᐊᕋᕕᑦ ᑕᑯᔭᐅᕕᑦᓴᓕᐅᕐᓗᑎᑦ.

ᐋᓐᓂᐊᓯᐅᕐᑎᒪᕆ ᐋᓐᓂᐊᓯᐅᕐᑎᓗᓐᓃᑦ ᐊᐱᕐᓱᓲᒃ ᖃᐅᔨᒐᓱᐊᕐᓱᑎᒃ ᖃᖓᒃᑯᑦ ᐃᕐᓂᓱᒐᔭᕐᒪᖔᕐᐱᑦ.

ᑎᒦᑦ ᖃᓄᐃᖕᖏᓯᐊᖁᓗᒍ, ᐊᐅᖏᕐᑕᐅᒐᔭᕐᑐᑎᑦ, ᐃᑎᕈᐃᑦ ᖃᐅᔨᓴᕐᑕᐅᓗᓂ ᓄᓕᐊᕐᓂᑯᓪᓗ ᐋᓐᓂᐊᖃᕐᒪᖔᕐᐱᑦ ᖃᐅᔨᓴᕐᑕᐅᓗᑎᑦ. ᓂᕆᒋᐊᖃᕐᓂᒥᒃ ᐃᙯᓕᓴᕐᓂᒥᓪᓗ ᐅᖄᕕᐅᒐᔭᕐᑐᑎᑦ ᓱᓇᓂᓪᓗ ᐊᑑᑎᒋᐊᖃᖕᖏᒪᖔᕐᐱᑦ.

ᐋᓐᓂᐊᓯᐅᕐᑎᒪᕇᑦ ᐋᓐᓂᐊᓯᐅᕐᑏᓘᓐᓃᑦ ᑎᒥᒃᑯᑦ ᐃᑉᐱᓂᐊᕐᓂᑎᒍᓪᓗ ᐊᑑᑎᖃᑦᑕᓂᐊᕐᑕᑎᓐᓂᒃ ᐱᐊᕋᑦᓴᖃᕐᓂᓂ ᐅᖃᐅᑦᔨᒐᔭᕐᑐᖅ. ᐃᑉᐱᒋᒋᐊᓕᑎᓐᓂᒃ ᐅᖃᐅᑦᔨᓗᑎᒃ - ᐱᓀᓗᑕᐅᑐᐃᓐᓇᕆᐊᓕᓐᓂᓗ.

ᐋᓐᓂᐊᓯᐅᕐᑎᒪᕆᓐᓂᒃ ᐋᓐᓂᐊᓯᐅᕐᑎᓂᓪᓘᓃᑦ ᑕᑯᖃᑦᑕᕆᐊᖃᕐᑐᑎᑦ ᐱᐊᕋᑦᓴᖃᕐᓂᓂ. ᖃᓄᐃᖕᖏᓯᐊᕐᒪᖔᕐᐱᑦ ᐱᐊᕋᑦᓴᓂᓪᓗ ᖃᐅᔨᒪᒐᓱᐊᕆᐊᓖᑦ. ᐊᐱᕆᐅᑎᑦᓴᖃᕈᕕᑦ ᐃᓱᒫᓗᒋᔭᖃᕈᕕᓪᓘᓃᑦ ᐊᐱᕆᒍᓐᓇᓯᐊᕐᑐᑎᑦ - ᐃᑲᔪᕐᑐᓴᐅᑦᓱᑎᒃ ᐊᑐᐃᓐᓇᐅᒪᑕ. 

ᑐᐹᑭᓐᓂᖅ, ᐃᒥᐊᓗᓐᓂ ᐋᖓᔮᓐᓇᑐᕐᑐᓂᕐᓗ ᐱᐊᕋᑦᓴᒥᒃ ᓱᒃᑯᐃᒍᓐᓇᑐᑦ. ᐱᐊᕋᑦᓴᑖᕈᕕᑦ, ᐱᒻᒪᕆᐅᔪᖅ ᑖᒃᑯᓂᖓ ᓄᕐᖃᓴᐅᑎᖏᒋᐊᖃᕐᑐᑎᑦ. ᐃᑲᔪᕐᑕᐅᒍᒪᒍᕕᑦ ᐋᓐᓂᐊᓯᐅᕐᑎᒧᑦ ᓄᓇᓕᑦᓯᓂ ᐅᖄᕕᖃᕈᓐᓇᑐᑎᑦ.

ᑐᐹᑭ

ᑐᐹᑭ ᐱᐊᕋᑦᓴᒧᑦ ᐊᓂᕐᑎᕆᑦᓯᐊᖏᒍᑎᐅᓲᖅ ᐱᕈᑦᓯᐊᖏᓚᕿᒍᑎᐅᑦᓱᓂ ᐱᐊᕋᑦᓭᓕᓚᕿᑐᐃᓐᓴᕆᐊᖃᕐᓱᓂᓗ. ᑐᐹᑭᒥᒃ ᓄᕐᖃᓗᑎᑦ ᑐᐹᑭᑦᑐᓂᓪᓗ ᓴᓂᓪᓕᖃᕐᑌᓕᓗᑎᑦ ᐱᐊᕃᑦ ᐃᒣᑦᑑᓂᐊᕐᒪᑦ:

  • ᐃᓅᓕᕐᕕᒋᒋᐊᓕᒻᒥᓂ ᐃᓅᓕᕐᓗᓂ - ᐃᓅᓕᑲᐱᒍᓐᓀᓗᓂ
  • ᐃᓅᓕᕐᓗᓂ ᐅᖁᒣᑦᑐᓯᐊᖑᓗᓂ - ᒥᑭᓗᐊᕈᓐᓀᓗᓂ
  • ᐱᐊᕋᐅᖏᓐᓇᓗᓂ ᐃᓅᒍᓐᓀᑐᐃᓐᓇᕆᐊᖃᖕᖏᓂᕐᓴᐅᓗᓂ
  • ᐳᕙᓪᓗᑐᐃᓐᓇᕆᐊᖃᖕᖏᓂᕐᓴᐅᓗᓂ
  • ᓯᐅᓯᕆᑐᐃᓐᓇᕆᐊᖃᖕᖏᓂᕐᓴᐅᓗᓂ.

ᐃᒥᐊᓗᒃ

ᐱᐊᕋᑦᓴᖃᕐᓂᓂ ᐃᒥᐊᓗᖃᑦᑕᕆᐊᖃᖕᖏᑐᑎᑦ. ᐱᐊᕋᖅ ᐊᓈᓇᖓ ᐃᒥᖃᑦᑕᑐᐊᕐᒪᑦ ᐱᐊᕋᑦᓴᐅᓂᕐᒥᓂ ᓱᕐᕋᑕᐅᓲᖅ.

ᐱᐊᕋᑦᓴᐅᓱᑎᒃ ᐃᒥᐊᓗᒻᒧᑦ ᓱᕐᕋᑕᐅᓯᒪᓂᕃᓂᖅ ᑐᑭᖃᕐᑐᖅ ᐱᐊᕋᐅᑉ ᓱᕐᕋᑕᐅᓯᒪᐅᑎᒋᒍᓐᓇᑕᖏᓐᓂᒃ ᐊᓈᓇᖓ ᐱᐊᕋᑦᓴᖃᕐᓱᓂ ᐃᒥᖃᑦᑕᑐᐊᕐᒪᑦ. ᓱᕐᕋᑕᐅᓯᒪᒍᓐᓇᑐᖅ ᑎᒥᖓ, ᐱᐅᓯᖓ, ᐊᒻᒪᓗ/ᐅᕝᕙᓗᓗᓐᓃᑦ ᐃᓕᑦᓯᒍᐊᕐᑑᒍᓐᓀᓗᓂ. ᐃᓅᓯᓕᒫᒥᓂ ᓱᕐᕋᑕᐅᓯᒪᒐᔭᕐᑐᖅ ᑌᒣᑦᑌᓕᒍᓐᓇᓯᐊᕐᑐᖅ ᐊᑑᑎᒋᐊᑐᕋᑎᓪᓗ.

ᐃᒥᐊᓗᖃᑦᑕᕈᕕᑦ ᖃᐅᔨᓗᑎᑦ ᐱᐊᕋᑦᓴᖃᕐᓂᓂᒃ ᓄᕐᖃᓴᐅᑎᒋᒋᐊᖃᕐᑐᑎᑦ. ᐃᒥᐊᓗᒻᒥᒃ ᖃᓄᐃᓪᓗᐊᑑᒐᓗᐊᕐᒪᑦ ᓱᕐᕃᒍᓐᓇᓂᖓ ᖃᐅᔨᒪᓇᖕᖏᒪᑦ ᐊᑦᑕᓇᕐᑐᖅ, ᑭᓯᐊᓂ ᖁᐊᕐᓵᖓᒋᐊᖃᖕᖏᑐᑎᑦ. ᐃᒥᖃᑦᑕᕈᓐᓀᓗᑎᑦ ᖃᐅᔨᑦᓴᑐᐊᕈᕕᑦ ᐱᐊᕋᑦᓴᖃᕐᓂᓂᒃ ᐋᓐᓂᐊᓯᐅᕐᑎᒪᕆᒻᒧᑦ ᐋᓐᓂᐊᓯᐅᕐᑎᒧᓪᓘᓃᑦ ᐅᖄᒍᓐᓇᑐᑎᑦ.

ᐋᖓᔮᓐᓇᑐᑦ

ᐋᓐᓂᐊᓯᐅᕐᑎᒧᑦ ᐅᖃᑦᓴᐅᑎᒋᓗᑎᑦ ᐃᕐᖃᒐᕐᑐᓲᖑᒍᕕᑦ ᐋᓐᓂᐊᓯᐅᑎᓂᓪᓘᓃᑦ

  • ᐱᖁᔭᑎᒍᑦ ᐊᖏᕐᑕᐅᒪᖕᖏᑐᑦ ᐋᖓᔮᓐᓇᑐᑦ - ᕿᐊᕈᒋᑦ, ᐅᔭᕋᖅ, ᐊᐳᑎ, ᑲᐴᑎ ᐊᓯᖏᓪᓗ.
  • ᐋᓐᓂᐊᓯᐅᑏᑦ ᐄᕐᖃᒉᑦ
  • ᓄᒃᑭᓴᐅᑏᑦ ᑎᒥᒧᓪᓘᓃᑦ ᓄᒃᑭᓴᐅᑏᑦ

ᐃᓚᖏᑦ ᐄᕐᖃᒌᑦ ᓱᒃᑯᐃᒍᓐᓇᑐᑦ ᐱᐊᕋᑦᓴᒥᒃ. ᐊᓯᖏᓪᓗ ᐃᓅᓕᕐᑎᓗᒍ ᓱᕐᕃᒍᓐᓇᓱᑎᒃ, ᐊᓈᓇᒥᑕ ᐃᒻᒧᖓᒍᑦ.

ᐃᑲᔪᕐᑎᖃᕐᓂᖅ

ᐃᒥᐊᓗᓲᑦ, ᑐᐹᑭᓲᑦ ᐋᖓᔮᓐᓇᑐᕐᑐᓲᑦ ᓄᕐᖃᕋᓱᒋᐊᒥᒃ ᐱᔭᕐᓃᓕᐅᓲᑦ.

ᓄᕐᖃᖃᔦᒪᒍᕕᑦ ᖃᐅᔨᒪᒍᕕᓪᓘᓃᑦ ᓄᕐᖃᖃᔦᒪᔪᒥᒃ ᑐᐹᑭᒥᒃ, ᐃᒥᐊᓗᒻᒥᒃ ᐋᖓᔮᓐᓇᑐᓂᓪᓗ ᐃᑲᔪᕐᑕᐅᒍᓐᓇᑐᑎᑦ ᓴᐳᒻᒥᔭᐅᓗᑎᓪᓗ. ᖃᓄᐃᖕᖏᓯᐊᕐᓂᓕᕆᔨᒧᑦ, ᐃᓱᒪᓕᕆᔨᒧᑦ ᐃᓄᓕᕆᔨᒧᓪᓘᓃᑦ ᐅᖄᒍᓐᓇᑐᑎᑦ.

ᖃᐅᔨᒋᐊᕈᓐᓇᒥᔭᑎᑦ ᐅᑯᐊ:

  • Alcoholics Anonymous
  • Al-Anon
  • Sexual Health Program
    Public Health Department
    Nunavik Regional Board of Health and Social Services
    Box 900
    Kuujjuaq, Quebec J0M 1C0
    Tel: 819 964-2222 / 1 844 964-2244, ext. 269