ᐃᓄᓕᒫᓂᒃ ᖃᐅᔨᒃᑲᐃᒋᐊᕈᑎᑦ ᑐᕌᒐᖃᕐᖢᑎᒃ ᓄᓕᐊᕐᓂᒃᑯᑦ ᖁᐱᕐᕆᔾᔪᑕᐅᕙᒃᑐᒥᒃ ᓯᕕᓕᔅᒥᒃ

13 ᕖᕝᕗᐊᕆ 2015

ᐃᖃᓗᐃᑦ, ᓄᓇᕗᑦ (ᕖᕝᕗᐊᕆ 12, 2015) – ᑖᓐᓇ ᓯᕕᓕᔅ ᓄᓕᐊᕐᓂᒃᑯᑦ ᖁᐱᕐᕆᔾᔪᑕᐅᕙᒃᑐᖅ ᐱᒋᐊᓚᐅᖅᓯᒪᕗᖅ ᐃᖃᓗᖕᓂ 2012-ᖑᑎᓪᓗᒍ ᑲᔪᓯᓪᓗᓂᓗ ᐊᐃᑦᑐᕐᓗᐃᔾᔪᑕᐅᕙᓐᓕᐊᓂᖓ ᓄᓇᕗᓕᒫᒥ. ᑕᒪᑐᒥᖓ ᑲᒪᒋᔭᖃᕋᓱᒃᐸᓪᓕᐊᓂᕐᒧᑦ, ᑖᒃᑯᐊ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᑦ ᐋᖅᑭᒃᓯᓯᒪᓕᖅᐳᑦ ᓄᑖᒥᒃ ᐃᓄᓕᒫᓂᒃ ᖃᐅᔨᑎᑦᑎᓇᓱᐊᕈᑎᒥᒃ ᑖᓐᓇ ᓯᕕᓕᔅ ᓄᖅᑲᖅᑎᑕᓇᓱᐊᖁᓪᓗᒍ. ᑖᓐᓇ ᓄᖅᑲᖅᑎᑦᑎᓇᓱᖕᓂᕐᒧᑦ ᐊᐃᑦᑐᕋᐅᑕᐅᔪᒥᒃ ᐱᒋᐊᖅᑎᑕᐅᓂᐊᖅᑐᖅ ᕖᕝᕗᐊᕆ 12-ᒥ, ᑕᐃᑲᓂ ᓄᓕᐊᕐᓂᕐᒧᑦ ᐊᒻᒪ ᕿᑐᕐᖏᐅᕐᓂᖅᒧᑦ ᖃᓄᐃᖏᑦᑎᐊᕐᓂᕐᒥᒃ ᐅᔾᔨᖅᓴᕐᓂᐅᑉ ᐅᓪᓗᖓᓂ.

“ᐃᓱᒫᓗᓪᓚᕆᓕᕋᑦᑕ ᐃᓄᐃᑦ ᐅᓄᖅᓯᕙᓪᓕᐊᓂᖏᓐᓄᑦ ᖁᐱᕐᕆᖃᑦᑕᖅᑐᑦ ᓯᕕᓕᔅᒥᒃ ᓱᓕ ᐊᒥᓱᕈᖅᐸᓪᓕᐊᖕᒪᑕ.” ᐅᖃᖅᑐᖅ Dr. ᔨᕈᑏᓐ ᐋᔅᐳᓐ, ᐃᓇᖐᓯᒪᔪᖅ ᐊᖓᔪᖅᑳᒻᒪᕆᖕᒥᒃ ᐋᓐᓂᐊᖅᑐᓕᕆᔨᒃᑯᓐᓄᑦ ᓄᓇᕗᒻᒥ. “ᐅᖃᖃᑎᖃᖃᑦᑕᖅᓯᒪᕗᒍᑦ ᓄᓇᕗᒻᒥᐅᓂᒃ ᐅᖃᖅᑐᖃᖃᑦᑕᖅᓯᒪᓪᓗᓂ ᐊᔪᕐᓇᖏᑦᑑᓂᖓᓂᒃ ᓱᖁᑎᒋᖏᑦᑕᕆᐊᒃᓴᖅ ᓯᕕᓕᔅ ᖃᐅᔨᒪᖏᒃᑯᕕᐅᒡᓗ ᑭᓲᖕᒪᖔᑦ ᐊᒻᒪ ᐅᑯᓂ ᑎᒥᖕᓃᓕᖅᐸᑦ ᖃᓄᐃᑦᑎᔪᓐᓇᕐᒪᖔᑦ. ᓄᓇᕗᒻᒥᐅᓪᓗ ᓱᓕ ᐅᖃᕐᓯᒪᒋᕗᑦ ᖃᓄᐃᒻᒪᑦ ᐅᓲᑉ ᐴᖏᓐᓂᒃ ᐊᑐᖃᑦᑕᕆᐊᖃᕐᒪᖔᑕ ᐊᒻᒪᓗ ᖃᓄᐃᒻᒪᑦ ᖃᐅᔨᓴᖅᑕᐅᔭᕆᐊᖃᕐᒪᖔᕐᒥᖕᓂᒃ.”

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑕᐃᒪᐃᓐᓂᖓᓄᑦ ᐊᒃᓱᕉᑎᖃᓕᕐᓯᒪᕗᑦ ᐃᑲᔪᖅᑐᐃᓂᕐᒥᒃ ᐋᓐᓂᐊᕕᖕᓂᒃ ᑐᑭᓯᑎᑦᑎᓇᓱᐊᕐᓂᕐᒥᒃ ᓴᖅᑭᑦᑎᓗᑎᒡᓗ ᑕᑯᔭᐅᔪᒃᓴᓂᒃ ᖃᓄᐃᑦᑑᖕᒪᖔᑕ ᓯᕕᓕᔅ ᐋᓐᓂᐊᖅ ᐊᔪᕆᖅᓲᔾᔨᓗᑎᒡᓗ ᖃᓄᐃᔾᔪᑕᐅᔪᓐᓇᕐᓂᖏᓐᓂᒃ. ᐱᒋᐊᓕᓵᖅᖢᓂ ᐋᓐᓂᐊᖅ ᐃᓚᖃᖅᐳᖅ ᐋᓐᓂᕐᓇᖏᑦᑐᓂᒃ ᐊᒥᕐᓗᒐᓛᓕᕐᓗᓂ ᐅᓲᑉ ᐅᑦᑑᓪᓘᓐᓃᑦ ᖃᓂᒋᔭᖓᒍᑦ ᐊᒥᒃᖠᓗᓂᓘᓐᓃᑦ, ᑭᓯᐊᓂ ᐊᒥᓱᑦ ᐃᓄᐃᑦ ᑕᑯᒃᓴᐅᔪᒃᑯᑦ ᐱᑕᖃᖅᖂᔨᔪᓐᓇᖏᑦᑐᑦ. ᐃᓅᓕᓴᖅᑕᐅᓐᓂᖏᒃᑯᓂ ᓯᕕᓕᔅ ᓄᓕᐊᕐᓂᒃᑯᑦ ᖁᐱᕐᕆᔾᔪᑕᐅᓲᖅ ᑕᐅᑐᒍᓐᓃᕈᑕᐅᔪᓐᓇᖅᐳᖅ, ᐆᒻᒪᑎᒥᒍᓪᓘᓐᓃᑦ ᐱᐅᔪᓐᓃᕐᓗᓂ, ᐊᒻᒪᓘᓐᓃᑦ ᑐᖁᔾᔪᑕᐅᔪᓐᓇᖅᖢᓂ. ᑖᓐᓇ ᓄᑖᖅ ᑕᒪᐃᓐᓄᑦ ᐃᓄᖕᓄᑦ ᖃᐅᔨᒃᑲᐃᔾᔪᑕᐅᓇᓱᐊᖅᑐᖅ ᐃᓚᖃᖅᐳᖅ ᐊᑭᓐᓇᕐᒥ ᓂᕕᖓᔪᒃᓴᓂᒃ, ᓈᓚᐅᑎᒃᑯᑦ ᑐᓴᖅᑕᐅᑎᑦᑎᓂᖅ ᐊᒻᒪ ᑕᓚᕖᓴᒃᑯᑦ ᓴᖅᑭᖃᑦᑕᖅᑐᒃᓴᐃᑦ, ᖃᕋᓴᐅᔭᒃᑯᓪᓗ ᓄᓇᕗᓕᒫᒧᑦ.

ᐊᑭᖃᖏᑦᑐᑦ ᐅᓲᑉ ᐴᖏᑦ ᐱᑐᐃᓐᓇᐅᕗᑦ ᑕᒪᐃᓐᓂ ᐋᓐᓂᐊᕕᖕᓂ, ᐊᒻᒪ ᓇᓂᕈᓘᔭᖅ ᑎᑎᕋᕐᕕᕈᔪᖕᓂ ᐊᒻᒪ ᖁᕕᐊᓱᓗᒡᕕᖕᓂ ᓄᓇᕗᓕᒫᒥ. ᓯᕕᓕᔅᒥᒃ ᐱᖃᕐᒪᖔᑦ ᖃᐅᔨᓴᖅᑕᐅᔪᓐᓇᖅᓂᖅ ᐊᑐᐃᓐᓇᐅᕗᖅ ᑕᒪᐃᓐᓂ ᐋᓐᓂᐊᕕᖕᓂ, ᐅᖁᒪᐃᓐᓂᕐᓂᐊᕐᕕᖕᒥ ᐃᖃᓗᖕᓂ. 

ᑐᑭᓯᒃᑲᓐᓂᕈᒪᒍᕕᑦ ᓄᓕᐊᖃᑦᑕᕐᓂᖅ ᖃᓄᐃᖏᑦᑎᐊᕐᓗᓂ, ᓄᓕᐊᕐᓂᒃᑯᑦ ᖁᐱᕐᕆᔾᔪᑕᐅᕙᒃᑐᑦ ᐋᓐᓂᐊᖅᑖᕈᑕᐅᕙᒃᑐᑦ ᒥᒃᓵᓄᑦ, ᖃᓄᐃᖏᑦᑎᐊᕈᓐᓇᕐᓂᖅ ᓄᓕᐊᕐᓂᒃᑯᑦ, ᐅᐸᒍᓐᓇᖅᐸᑎᑦ ᓄᓇᔅᓯᓐᓂ ᐋᓐᓂᐊᕖᑦ ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᐅᕗᖓwww.irespectmyself.ca.

###

ᑕᒪᐃᓐᓄᑦ ᑐᑭᓯᒋᐊᕐᕕᒃ:
ᕌᓐ ᐅᐃᓯᖕᒃ            
ᑐᒡᓕᐊ/ᐊᐅᓚᑦᑎᔨᐅᑉ ᑐᓴᐅᒪᖃᑦᑕᐅᑎᓂᕐᒧᑦ ᐃᓄᓕᒫᓄᓪᓗ ᑐᕌᖅᑐᓂᒃ ᐱᓕᕆᔨ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5710
rwassink@gov.nu.ca