IQALUIT, Nunavut – Syphilis-kut aannialaquti amigaittunun aullaqtiqtuq Iqalungni 2012mi aulahimmaaqtuq hiamitiqhuni tamaani Nunavunmi. Kiunikkut, Aanniaqtailinikkut Havakvia piliuqhimaliqtuq nutaamik inungnun qauyihimaquyautjut nuttaqtinniarhimanikkut syphilis-mik. Nutaaq aghuurhaitjutit aullaqtiqniaqtuq Fipyuali 12mi, Kanadami Nuliaqnikkut Ingilrutikkullu Aanniaqtailinikkut Qauyihimanikkut Uplua.
“Ihumaaluktugut taimaatut amigaitilaangit inuit aannialaqitjutiqaliqtut syphilis-mik aulahimayuq amigaiqhimmaaqtiqhuni,” uqaqtuq Dr. Geraldine Osborne, Atannguyaullaqtuq Aanniaqtailinikkut Taaktigiyauyuq Nunavunmun. “Uqaqatigihimayavut Nunavunmiut unniutihimayaatigullu ayurnaittuq hugingittaangani syphilis ilihimangitkungni hunauyaaghaanganik ukuningalu hivituniqaqtut aannialaqinikkut pitjutait. Nunavunmiut unniutihimayaatigullu huuq atuqtukhauyut puunik huuqlu ihiviuqhiqtauyughat.”
Aanniaqtailinikkut Havakvia taimaatut pimmarighaqhimayaa inungnun aanniaqtailinikkut unniutjutait tautuktipkaiplutik naunaitkutinik syphilis-kut qanurilipkaitjutainnik uqaqhugillu qanuqtuq pitjutiyauliqtaaqniit. Hivulliit qanurilipkailitjutait ilaqaqtut ulurianaittumik kilaaqmik ingilrutini aupatjaqniqluunniit, taimaatullu amigaitun inuit piqangittut qanurilipkaitjutinik. Havauhiqtauhimaittut syphilis takpiirutiyauttaaqtut, uummatimik hakuiqtittaaqtut, tuqupkaiyaaqtuqlu. Nutaaq syphilis inungnun qauyihimapkaitjutikkut aghuurhainiq ilaqaqtuq piksanik, naalautikkut tiivikkullu ilitturipkaitjutinik, ukuningalu tweets-nik tamaani Nunavunmi.
Akiittut puut manimayut tamainni munarhitkunni, ukunanilu naliinni havakvikni ulapqiviknilu tamaani Nunavunmi. Syphilis-kut ihivriuqhirutit hailihimayut tamainni munarhitkunni, uvanilu Inungnun Munarhitkunniani Iqalungni.
Aallanik ilitturipkaitjutikhanik nuliaqnikkut aanniaqtailinikkut, nuliaqnikkut hiamitiqtaaqtunik aannialaqutinik, aannialaqinnaittukkullu nuliaqnikkut, takuyaqtutjavat nunallaami munarhitkut takuluguluunniit una www.irespectmyself.ca.
###
Uqaqatigivikhaq:
Ron Wassink
A/Atannguyaq Tuhaqtipkainikkut Inungnunlu Pitjutiliqinikkut Aanniaqtailinikkut Havakvik
867-975-5710
rwassink@gov.nu.ca