ᓱᐴᖅᑐᖃᑦᑕᕐᓂᕐᒥᒃ ᓱᓕᙱᑦᑐᑦ ᐊᒻᒪ ᓱᓕᔪᑦ

ᓱᓕᙱᑦᑐᖅ: ᓱᐴᖅᑐᖃᑦᑕᕐᓂᖅ ᓂᕈᐊᕆᔪᓐᓇᖅᐸᕗᑦ.
ᓱᓕᔪᖅ: ᓱᐴᖅᑐᕆᐅᓕᓵᖅᖢᓂ, ᐄ. ᖃᔅᓰᖅᓱᐊᕐᔪᒃᖢᓂ ᓱᐴᖅᑐᖅᓯᒪᓕᖅᖢᓂ, ᐋᒃᑲᐅᓂᖅᓴᖅ. ᑎᐹᖕᒧᑦ ᐅᐃᕆᓴᕋᐃᓐᓇᕐᒪᑦ. ᐅᐃᕆᓯᒪᓂᖅ ᓄᖅᑲᐅᑎᓇᓱᓕᖅᖢᒍ ᐊᔪᕐᓇᕐᔪᐊᕈᓐᓇᕐᒪᑦ.

ᓱᓕᙱᑦᑐᖅ: ᐊᑕᐅᓯᐊᑦᑎᐊᕐᓗᓂ ᓱᐴᖅᑐᕋᓱᒡᓗᓂ ᖃᓄᐃᙱᑦᑐᐊᓗᒃ.
ᓱᓕᔪᖅ: ᓯᒡᒐᓕᐊᑉ ᐳᔪᐊᓂᒃ ᐊᑕᐅᓯᐊᑐᐃᓐᓇᕐᓗᓂ ᓂᐅᖅᓯᓗᓂ ᑎᒥᖕᓄᑦ ᓱᕋᒍᑕᐅᔪᓐᓇᖅᑐᖅ.

ᓱᓕᙱᑦᑐᖅ: ᓯᒡᒐᓕᐊᑦ ᑭᖕᒥᕕᓕᖅᓯᒪᔪᑦ ᐊᑦᑕᕐᓇᙱᓐᓂᖅᓴᑦ.
ᓱᓕᔪᖅ: ᑭᖕᒥᕖᑦ ᐅᕙᑦᑎᓐᓂ ᓴᐳᑎᔾᔪᑎᒋᔪᓐᓇᙱᑕᕗᑦ. ᓯᒡᒐᓕᐊᒥ ᐳᔪᖓ ᐊᓂᕙᓪᓕᐊᔪᖅ ᐳᔫᙱᓐᓂᖅᓴᐅᑐᐃᓐᓇᓲᖅ. ᓯᒡᒐᓕᐊᒥᒃ ᐅᐃᕆᓐᓇᖅᑐᖅ ᒥᓗᒃᓯᑦᑎᐊᕐᓇᕐᓂᖅᓴᐅᕗᖅ, ᐅᐃᕆᑉᐸᓪᓕᐊᓐᓇᕐᓂᖅᓴᖅ.

ᓱᓕᙱᑦᑐᖅ: ᖃᑯᒍᙳᐊᓗᒃᑎᓪᓗᒍ ᑭᖑᕙᓗᐊᕐᓇᖅᐳᖅ, ᑎᒥᑦᑎᒍᑦ ᓱᕋᒃᑕᐅᕌᓂᓲᖑᔪᒍᑦ.
ᓱᓕᔪᖅ: ᐃᓅᓰᑦ ᐱᐅᓯᕚᓪᓕᑲᐅᑎᒋᔪᓐᓇᖅᐳᖅ ᓯᒡᒐᓕᐊᒧᑦ ᓄᖅᑲᑐᐊᕈᑦᑕ−ᖃᓄᒥᐊᖅ ᐅᑭᐅᖃᖅᑎᒋᒐᓗᐊᕈᕕᑦ. ᐊᑯᓂ ᓱᐴᖅᑐᖅᑎᐅᖏᓐᓇᓕᕈᕕᑦ, ᑎᒥᒃᑯᑦ ᐋᓐᓂᐊᕐᓂᖅᓴᐅᓕᕈᓐᓇᖅᐳᑎᑦ.

ᓱᓕᙱᑦᑐᖅ: ᓱᐴᖅᑐᖅᑐᒥᒃ ᐳᔪᖓ ᓱᐴᖅᑐᙱᑦᑐᒧᑦ ᓂᐅᖅᑲᖅᑕᐅᔪᖅ ᓱᐴᖅᑐᖅᑎᐅᙱᑦᑐᓄᑦ ᐸᒡᕕᒋᔭᐅᔪᓐᓇᖅᑐᖅ ᑭᓯᐊᓂ ᐊᑦᑕᕐᓈᓗᙱᑦᑐᖅ.
ᓱᓕᔪᖅ: ᐃᓄᐃᑦ ᓱᐴᖅᑐᖅᑕᐅᔫᑉ ᐳᔪᕐᓗᖓᓂ ᓂᐅᖅᑲᖅᑐᑦ ᓂᐅᖅᓯᖃᑕᐅᓲᖑᕗᑦ ᐳᔪᕐᓗᐊᑕ ᓱᕈᕐᓇᖅᑐᖏᓐᓂᒃ ᓱᐴᖅᑐᖅᑏᑦ ᓂᐅᖅᑲᖅᐸᒃᑕᖏᓐᓂᒃ. ᓱᐴᖅᑐᖅᑕᐅᔪᒥᒃ ᓂᐅᖅᓯᖃᑦᑕᕐᓂᖅ ᑳᓐᓱᑖᕐᓇᕐᒥᔪᖅ ᐊᓯᖏᓐᓂᒡᓗ ᐋᓐᓂᐊᖅᑖᕐᓇᖅᖢᓂ−ᑕᐃᒃᑯᐊᓘᓐᓃᑦ ᐃᓄᐃᑦ ᓱᐴᖅᑐᓚᐅᖅᓯᒪᙱᑦᑐᑦ.

ᓱᓕᙱᑦᑐᖅ: ᓱᐴᖅᑐᒐᕐᒥᒃ ᒥᓗᒃᓯᓪᓗᓂ ᐱᐅᓂᖅᓴᖅ ᓯᒡᒐᓕᐊᒥᒃ ᒥᓗᒃᓯᓂᕐᒥᒃ.
ᓱᓕᔪᖅ: ᓱᐴᖅᑐᒐᕐᒥᒃ ᒥᓗᒃᓯᕙᒃᖢᓂ ᐳᕙᖕᓄᑦ ᐊᓯᔾᔨᕐᓇᖅᐳᖅ. ᓱᐴᖅᑐᒐᕐᓂᒃ ᒥᓗᒃᓯᖃᑦᑕᖅᖢᓂ ᐱᕐᔪᐊᕌᓗᖕᒥᒃ ᐋᓐᓂᐊᖅᑖᕐᓇᖅᑐᖅ, ᓲᕐᓗ ᐳᐃᒍᑐᓕᕐᓗᓂ, ᐱᓕᕆᐊᒥᓂᒃ ᐅᔾᔨᑦᑎᐊᕈᓐᓃᕐᓗᓂ, ᓂᑲᓪᓗᖓᓕᕐᓗᓂ, ᐊᒻᒪ ᑎᒥᖏᑦᑎᒍᑦ ᓴᐳᒻᒥᔾᔪᑎᖏᑦ ᓴᙲᑦᑐᑯᓘᓕᕈᓐᓇᖅᑐᑦ.